.i so'i ckafybarja lisri ba'o se finti .i ĭa na to'e jetnu fa lo du lo ckafybarja lisri cu na'e tolvajni pagbu lo jbobau kulnu je lo citri pe lo jbobau prosa .i ti liste lo ckafybarja lisri poi lo nu finti ki cu pu'arno (to ro lo ckafybarja lisri ca jai pu'arno .i ku'i lo nu finti su cnino cu cumki (to .e'e toi) toi) .i je'u so'i mei .i pe'i lo nu xo kau mei cu banzu lo nu lo ckafybarja lisri cu pa mei lo ralju liskle pe lo jbobau prosa
le la vei,on ckafybarja srinuntroci xipa
ni'o zdani
.i ckafyzda
.i mi zvati le vorstu gi'e terpanci loi ckafi da.uicai
.i mi ca ze'upu.oi na'e sumne da
.i mi dzukla le jbustu gi'e ctacarna
.i rancindu jubme
.i vrici slada'i noi mi na djuno zo'e ke'a
.i ji'ipano zutse remna
.i patxu loi ckafi lei mudri
.i vrici
.i mi visfacki fi pa lo poi loi remna na zutlamji ke'a ku'o jubme
goi ko'a
.i mi co'a zutlamji ko'a
.i ko'a lamji le nunjupca'u
.i le jukpa selviska gi'e jukfinti de.a'ucu'i
.i mi pensi.a'e loi selpinxe ckafi.au
.i ckafypanci fi mi.ui
.i ckafypanci
.i .ui.o'u
.i zdani
—veĭon
le la vei,on ckafybarja srinuntroci xire
ni'o mi penzutse.o'u
.i to'ernanda'i fa lemi jubme
.i ciska da le jbusfe .ije mi catlu da.a'u
.i lerfu la fraktur.ue
.i mi morji fi loi lerfu be la fraktur.
.i morji
.i mi puzuki zvati le ckule gi'e caca'a tcidu
.i mi tcidu le cfika be le ze bruna bei la Aleksis.kivis.
po'u le natmytercfi
.i le poi le drata be mi tcidu fi ke'a ku'o selpapri cu te prina loi
lerfu be la antik.
.i lemi selpapri goi ko'a te prina loi lerfu be la fraktur.
.i lenu tcidu da ta'i la fraktur. kei pu nandu mi gi'e ca frili
.i mi djica lenu tcidu fi ko'a kei mu'i lenu lemi patfu pupu prina
loi lerfu loi ko'a papri
.i lemi patfu ze'u prina
.i lenu ri go'i kei nanca vobi
.i mi kica'o catlu le vi lerfu be la fraktur.
.i lerfu
.i cusku.ue zo coi
.i barjyjatna.a'a
.i la nitcion. co'ava se zvaju'o mi
.i ra xanse rinsa mi .ije mi spuda rinsa
.i la nitcion. caca'a xebni la fraktur.
—veĭon
le la vei,on ckafybarja srinuntroci xici
—ni'o sriku'a
.i ckafybarja
.i mi zvati le vorstu gi'e terpanci loi ckafi da.uicai
.i mi ca ze'upunai.oi sumne da
.i mi dzukla le jbustu gi'e ctacarna
.i rancindu jubme
.i seldandu lo vrici to'erninda'i noi mi na djuno zo'e ke'a
.i selzvati ji'ipano zutse remna
.i srotanxe loi ckafi lei mudri
.i vrici
.i mi visyfacki fi pa lo poi loi remna na zutlamji ke'a ku'o jubme goi ko'a
.i mi co'a zutlamji ko'a
.i ko'a lamji le nunjupca'u
.i le jukpa cu selviska gi'e jupfinti de.a'ucu'i
.i mi pensi.a'e loi selpinxe co ckafi.au
.i ckafypanci fi mi.ui
.i ckafypanci
.i .ui.o'u
.i sriku'a
—veĭon
la nitcion. klama le kafybarja
.i mi se lidne la vei,on. ba'acu'i lenu nerkla le la jbolaz. kafybarja
.i mi sutra joiku'i.o'a banli cadzu pa'o le cravro noi tilju je jadycau
.i lenu mi pu kargau le vorme cu mlirocnandu gi'e sacri'a lenu mi catke
.i le te vorme cu se gusni lo lecydo'i milxe gi'e se kufra cmalu
.i panomei sa'enai.a'acu'i loi jubme
.i mi zutse ne'a lo na'e se tsejbi jumbe {poi diklo le kumfa kojna gi'e
stula'i le vorme ku'o} gi'e catlu loi zvapre
.iza'a la vei,on. zutse vi le ragve kojna gi'enaipe'i zvaju'o mi
.i ra zanfri .i'e.o'enai loi panci be loi vi ckafi
.i mi zmanei loi tcati gi'e.o'o.aucu'i denpa lenu lo djabe'ipre cu jundi mi
.i milxe savru gi'e ruble nungei
.iku'i mi cabdei melu.i'inai li'u vau.u'uru'e
.i lei bitmu cu se jadni loi carmi bo vrici joi na'e mitsarxe beja'i le tcaci
.i le re cpare ka'amru poi mitkruca se punji fi le cravro gapru na minrysarxe
.u'iru'e
.i na go'i fa loi drata ke bitmu se punji nemu'u lo dembi poi vreta lo kicne
ku'o jo'u lo slabu tcityta'o nesecu'u lu vi xagrai loi tauzba pe levi tcadu li'u
ge'ujo'u lo befydai noi te ciska zo sindereluud.
.i mi ca jundi le jbusfe pe mi
.i te ciska so'ida nebau la lojban. e la bangrnesperanto .e le glibau .e.ueru'e
le dotco
.i le dotco cu se ciska ta'i la fraktur
.i mi xebni la fraktur
.i mi djica (lenu ciska fi le jbusfe fe lu mi la fraktur xebni mi'e kilrois.
li'u kei) gi'enai ca ponse lo ve ciska befi loi mudri
.i mi ka'e lebna lo cpare ja bisli kilmru le zunle bitmu
.i mi co'i morji le xajmi pe lei bisli kilmru jgari rlcisge'upre
.iku'i lenu le xajmi cu jboselsku na se snada mi
.isemu'ibo mi pensi sanga le se finti be la suZAN.vegas.be'o peme'e lu le la
tom. gusta li'u
.i lenu go'i cu se dicra lenu lo djabe'ipre noi .uacu'i xindo cu klama mi gi'e
cisma bacru lu cticpe ma doi lojbo ga'icu'i li'u
.i mi co'a se spaji catlu le be'ipre .i mi nelci le be'ipre
.i mi mutce nelci co se trina le be'ipre ja'e lenu mi na spuda ri
.iseki'ubo ri cmila joiku'i milxe bo se fanza bacru lu be'ebe'e xaupre zo'o
ctidji ja pixydji ma li'u
.i mi spuda barcu lu je'eki'e pendo .u'u si ba'edo'u.u'u .u'ise'i go'i lo tcati
li'u
.i le be'ipre goi ko'a cu bacru lu go'i lo tcati pele'a ma li'u
.i mi lu .aicu'i do ma stidi li'u
.i ko'a lu .e'a la kukytcat. noi vi purlamrai terve'u li'u
.i mi lu .i'e ko bevri le la kukytcat. tcati li'u
.i ko'a bacru lu baziba'o go'i .oinai li'u gi'e cliva mu'i lenu bevri nagi'e
tavla lo drata zutse
.ipujecabo lu'i le jukpa kuce le patlu'i lu'u nevi le jupku'a cu cladu joi
selzdi dabysnu
.i le jukpa cu so'uroi batykla gi'e ve jivrei le se casnu lei zvati
.i.aucai mi na te preti
.i le barjyjatna noi dasni lo jikri'i taurgunma ca tavla la vei,on.
.i mi xance rinsa la vei,on. i ko'a spuda rinsa gi'e nupre lenu bazi kansa mi
kei mi
.i loi cnino cu nerkla gi'e cladu rinsa loi no'e cnino noi na'oca'o te lisri
.i mi na .ai cabdei ve lisri
.i mi .a'icu'i cabdei xebni la fraktur.
—nitci'on
lo lisri pe le ckafybarja
ni'oni'o
vanci
.icabo nalcladu ne'i le ckafybarja
.i lebi'u remna cu klama mo'ine'i ra
.i ko'a goi ra zutse ne'a lo jubme
.i ko'a cpedu loi tcati le kafybarja se jibri
.i ba so'o mentu ko'a se dunda loi tcati gi'e co'aru'inai pinxe ri
ni'o
ko'a ca lenu ko'a pinxe loi tcati po ko'a cu zgana lenu lebi'u nanmu
cu se dunda lei ckafi poi ra pu cpedu ke'a
.ije le nanmu goi ko'e cu pencu le kabri poi se nenri lei ckafi ku'o
le degji gi'enai pinxe lei ckafi
.ije mu'i zo'epela'edi'u ko'e cusku <<lu .o'onai ju'i do'u
ko lebna lei vi ckafi gi'ebabo bevri fi mi fe lei je'a glare
ku'i ckafi li'u>> le bevri be lei ckafi be'o goi ko'i
.i ko'i cusku <<lu .u'u .ie ga'inai li'u>> gi'ebabo lebna le kabri
.i ko'i krefu klama gi'e bevri lei ckafi vau ba so'o mentu
.i ko'e krefu pencu le kabri
.i ko'e cusku <<lu .i'esai ba'e ti ku'i cu je'a glare ckafi li'u>>
.i ko'e gleki pinxe lei ckafi po ko'e
no'i
ko'a zgana la'eso'odi'u
.i ba so'o mentu ko'a tavla le bi'unai selpinxe bevri goi ko'i
.i ko'a cusku <<lu .ia do pu bevri lei naldrata ckafi ta vau xu li'u>>
.i ko'i cusku <<lu go'i .o'unairo'a .u'uro'a li'u>>
.i ko'a cusku <<lu ko .i'i na jikca dunku .i mi puzuze'u se jibri
loinu bevri loi selpinxe vi lo gusta .iseki'ubo mi djuno tu'a le do se zukte
.i da poi prenu cu genai pinxe lei ckafi gi pencu le kabri gi'e
na djica tu'a lei ckafi ki'u loza'i na'e pe'ise'inai glare
.ije semu'i loinu da minde mi lenu basti lei ckafi loi glare ckafi kei kei
mi lebna lei ckafi gi'e na'o denpa fu'i so'e mentu tezu'e lenu lei ckafi
cu glaryri'a le kabri kei fo lenu krefu dunda lei naldrata ckafi
.i za'a do panra zukte
.i la'ede'u ve ctuca fu tu'a le slabu lisri be le bebna seljibri ka'u li'u>>
.i ko'i cusku <<lu le lisri ki'a li'u>>
.i ko'a cusku <<lu .ue do punaixu ve lisri fu ri li'u>>
.i <<lu noroi ve lisri li'u>>
.i <<lu .ai mi te lisri
.i tu'e ka'u da'i puzuki da te bende le re seljibri
.i fo'a goi le te bende ca le fanmo be le jeftu cu pleji le se jerna
le re seljibri no'u lu'i le prije seljibri goi fo'e ge'u jo'u le bebna seljibri goi fo'i
.i le se jerna cu rupnu li panono
.ijesemu'ibo fo'a pleji lei jdini beta'i le pelji jdini fo'e .e fo'i
.i fo'e ckire fo'a gi'ebabo cliva gi'e gleki ki'u lenu le jdini cu se vamji li su'orau
.i fo'i na'e gleki
.i cusku <<lu .o'onai mi to'e lazni gunka fi'o te bende do ca piro le jeftu
.i do pleji levi malpelji .i'enaisai mi
.i le'o ko pleji fi mi fe le je'u je'a jdini no'u lo sicni li'u>>
.isemu'ibo fo'a pleji fo'i lo gusminra sicni poi se fepni li mu
.iseki'ubo fo'i gleki klama lefo'i zdani tu'u
.i tu'a di'u xe ctuca fi ledu'u jdice nagi'apubo e'ucai zgana
.i .ua ri'a je'unai ka'u le sego'i zo "za'a" noi cmavo
fi lesi'o zgana ku'o cu rafsi zo zabna li'u>>
—cylsyn
su'u xekri
pamo'o
<<lu go'e .ibaboke'u ko'u bacru <<lu ko seljde loi mabru li'u>>
li'u>>
.i lei puze'a tirna cu milxe ke cfipu cmila .i la paul. bacru
<<lu mabru tcini .u'iru'e li'u>> gi'e cevni melbi co dasni lo
xekri birtu'ucau .i'ero'u nercre .i ge lerci tcika vi le barja
gi cevni carmi co xekri fa le tsani za'a loi selca'o selne'i
.i so'o ve barja mo'u cliva .i la lizbet. na'e go'i cadykei
{be le xekri tedykerfa be la paul. kalsa be'o} se mlifanza
cisma no'e zanru le xajmi .ivusaibo ti'e xekri kalsa loi
juntytri .ii poi vlipa joi vlile joike daspo joi finti vau.u'a
.ikivive'i simsa go'i ro'a .i'unai
no'i la liz. dasni lo grusi notcre (to leno'a cu se kanla loi
danmo blanu za'a toi) be <<lu lenu prami cuca'e nu nelci carmi
se trina lo prenu ju nakni ju fetsi vau pa'ero'a li'u>> ne loi
lerfu co xekri .i mi (to lego'i cu se kerfa loi na'e kalsa
za'a toi) cairmau meleli'i grusi .i grusi fa lemi plokarlycre
.e le palku .e le kosycre noi jgena se dasni ru'u le xadmidju
.i su'o prenu cu ba'anaita'o sanga bacru <<lu .i GRUSypre ce
GRUSytau ce grusyXIRMyXEMkla li'u>> .ina'igo'i sa'e .i lu'e
gy.ce'ory.ce'o.ubuce'osy. cuka'u drani se basti lu'e xy.ce'o.ebu
ce'o ky.ce'ory.
.ita'ocu'i su'u xekri kei vi le kafybarja
ni'oremo'o
su'o bevri cu.a'acu'i masno kalsydzu zo'i loi ve barja .i la
paul. cu tavla (to leno'a mebri cu jurja'o .i le laurxajmi pu'i
vlipa .au toi) fi leli'i ge'utro .i <<lu .i mi du'eroi .u'anaizo'o
se ge'utro .iku'i mi purlaicte se go'i la liz. oinai.u'i li'u>>
<<lu.i xu purpla go'i zo'o li'u>> <<lu .ipe'i.ianai snuti li'u>>
<<lu.i la paul. jikfanza .iepei doi liz. .u'iru'e li'u>> <<lu .i
carmi jikfanza ju'o .iu .i ko co'u xlapre .i'u li'u>> <<lu .izo'o
tu'ako bapli .e'inai li'u>> (to pu'i vlipa .au fi leka smaji ke
tcila prami joi pendo noisu'anai se mupli na'ebo lecaca'a seltai
.i'o toi) <<lu .i mi le'o go'i li'u>>
.i la paul. ce la liz. co'a cisma simtipyda'a ni'a le jubme .i
la liz. (to gasta bo demxa'e ce margu bo jamfu ce xamsi bo kanla
vau .io toi) certu lezu'o bracau damba .i mi se mliburna ctacarna
co na'eke bracau damba certu gi'e zgana le barja
ni'o le patlu'i kujo'u le jukpa puza cliva .ija'ebo le barja cu
tatpi smaji .iji'a le trixe be le barja be'o {noi di'i krasi
{leka to'e cando gi'e kurfa kei} ki'u {lepu'u ru vi ri zdidabysnu
(to <<lu .i do te sluji le birka lo mleca be la'emi .o'a li'u>>
<<lu .i.e'u mi'o cipra .a'e birvrajvi .i.ai le prite .i do djuno
.o'ocu'i ledu'u le zunle pe mi tsame'a le prite birka doi paul.
li'u>> <<lu .i xu purpla go'i zo'o li'u>> toi) tigni fi loi ve
barja}} cu ca malmliselgu'i ke dukri'a kunti .i la paul. jinga
fi la liz. lenu birvrajvi .i la liz. go'i fi mi fu'i (to ba'e
dukri'a kunti toi) .i lerci tcika vi le barja .i mi'a pu'o
jbuboikei
ni'ocimo'o
le jatna <<lu .i.a'o do joi le pendo be do cu xaufri ca leca
vanci li'u>>
mi <<lu .i go'i .io .i ca pamoi zu'o mi vitke le barja calo
relmomcte .iza'a .u'eru'e lei ve barja cu clira cliva ca le
cabdei li'u>>
.i le re jibni be mi depci'o catlu le jatna
.i le jatna <<lu .i go'i ki'u leka lei cibdei na'o cabdei lenu
mutce gunka kei vi levi tcadu .ita'o do noi ta'e klama le barja
ca lei xavycte cu punai pe'i penmi la xiron. noi vi sidju li'u>>
.i la paul. ce la liz. smaji casnu lenu ri jo'u ra ba litru la'e
le merko .i le jatna cu degji jarco le clani ke blabi creka
xadyti'e be le cnino be mi gi'e cisma bacru <<lu .i.ai mi bazi
benji ri do ge'e li'u>> gi'e cliva
.i la liz. bacru <<lu .i do li'a selxagmau mi'a tu'a le bangu
.o'o li'u>> .i le re se cimei na lojbo
.i mi <<lu .i nu vlipa jivna zo'o .i mi jitro joi seltro li'u>>
la paul. <<lu .i ca ronu za'u prenu cu simfra cu nu vlipa jivna
ru'a .i go'i cu'u la djen. vecu'u le samsnuci'e .iseni'ibozo'o.
iecu'i go'eje'u li'u>>
mi <<lu .i xu purpla go'i zo'o li'u>>
la paul. <<lu le xaupre za'ota'e bacru <<lu xu purpla li'u>> li'u>>
mi <<lu .i xu purpla go'i zo'o li'u>>
la liz. <<lu .i co'a lerci .i doi paul. do pu nupre lenu mi'a
clira sipna .i mi cutyzu'e co bavlamdei li'u>>
la paul. <<lu .i.u'i xu purpla go'i li'u
mi <<lu .i.ua mi se sitna li'u>>
(tosa'a lemu'e sitna na dunli lemu'e xusra .i la paul. cu nalri'i
bacru la'ezo simfra gi'u xusra .i loi cmavo be "zo zo'o na'o
banzu lenu lo te sitna lo se xusra cu frica .i lemu'e mi se sitna
cu te ciste lo pemci joi kelci jenai xusra plitadji be la paul.
bei le bangu bei lenu jikca pluja .i na nibli fa le nunsitna lenu
morna sinma .i na nibli na'ebolesego'i.u'i .i mi mutce me"zoto tavla
.ixuse'izo'o purpla go'i toi)
la liz. <<lu malxlu zo'o li'u>>
.i lerci tcika vi le barja .i mi'a puba'o jbuboikei .i lei bevri
cu.a'acu'i masno bo kalsydzu fa'u sutra bo kalsydzu fa'u cando
.i casnu loi sancrfrikative .e loi relcisrampre girvlici'e .e loi
nalzva pendo ca'o le nicte noi srura be loba'a vu trene co pelxu
gusni nenri pamei ke sirji darno xemkla zmitai ke snura grusi
nalkalsa kunti be'o .uo xekri
—nitci'on
le kafybarja po'u la jbolaz.
lu .ie.a'a .ie.o'onairu'e (cu'usa'a mi noi caki baikla pa'o le vorme
fi'o te mlixra le janco ku'o) sera'a ma pezyjicla li'u
.i mi pu zdani zutse co cando .icabo mi terbei lo notci poi
ve cusku le se du'u lu'o la vei,on. joi la nitcion. lu'u goi ko'a
noi zvati le kafybarja po'u la jbolaz. cu djica lenu penmi mi vi ra
.i lu ma mo li'u na se spuda
.i ko'a jundi casnu la fraktur.
.i mi zo'u la fraktur. no'e cinri
.i mi cfatse ne'a lo jubme poi lamji le me ko'a
gi'e denpa lenu se zvaju'o da no'u ga ko'a
gi lo selfu noida'i bevri loi ckafi mi
ni'o lemi jubme cu manku seja'e loni to'ercitno
.i ra ve srakysku zo mi ce'o prami bu ce'o lu le cmacrnalgebra li'u
.i mi nelci le jubme
.i mi nalmorji fi la vei,on. .e la nitcion.
gi'e co'a pensi
.i misi'a se cinri so'a jutsi belo sinxa ciste be'o neda'i
ga le me loi javni me'u nemu'u le sucta cmacrnalgebra
gi le mecritli noi se mupli loi rarna ja rutni bangu
.i la'edi'u mukti lenu mi tadni la lojban. kei noi ki'u ke'a
mi zvati la jbolaz.
no'i lo be'ipre cu klama co vreji lemi selcpe po'u
le barda tsali bo ckafi gi'ebabo
nalsirkla mo'ize'oku na'e mo'ifa'a le jupku'a
.i .uaru'e simlu falenu ko'a ze'apu naje ca zvaju'o mi
.i mi'a simxu rinsa
.i la'aru'e mi bazi facki le krinu belenu sutrygau
—in
lo ke'unai lisri pe la jbolanzu kafybarja
.i bazi lenu mi'a simxu lenu rinsa kuku lo nanmu poi nanca li so'a
cu klama fole na'e sirji ne'i le barja gi'e co'a zutse ca'u mi
.i le nanmu goi ko'a cusku le se du'u ri puzi se gunta lo puzu respa
pe la'o ly. Saurischia ly.
.i lu<< .iku'i loi respa pe la'edi'u cu puzu ji'esti >>li'u se cusku mi
.i lu<< .ila'aru'e go'i .iboku'i simlu fa lenu naku su'oda zo'u
da cusku di'u ra cu'usa'a ko'a
.i lenu mi'a simxu lenu kansa cu nanca li reno
.i mi co'aki kurji ko'e goi le respa ca lenu ri ca'o citno
.i mi jinvi ledu'u le mamta be ko'e cu morsi ba'o lo nanca beli so'o
.ije cumki fa lenu ko'e romoi lu'i le jutsi
.i le pendo be mi zu'apu kurji ko'e gi'eku'i puzi
co'a speni gi'e gasnu lenu cfari fa lenu lanzu kuku gi'e jinvi ledu'u
vo'a na kakne lenu tu'ari xamgu ge ko'e gicabo le lanzu
.isemu'ibo lego'i cpedu lenu mi curmi lenu te dunda lenu bilga
lenu kurji ko'e
.i mi je'a curmi gi'eja'ebo kiku nu'i bi'ogi cala'edi'u gi caku
dunda loi cidja .e loi djacu ko'e
gi'e satre ko'e gi'e fi lenu cadzu cu kansa fe ko'e
.i ca le vanci mi tavla ko'e so'i klesi be lei te cilre be'o
nemu'u le citri be loi jmive beva'o le terdi be'obe'o .e
loi jicmu bele saske bele munje poi vanbi ma'a
.i jetnu fa lenu ko'e na kakne lenu tavla .ijeku'iseki'unaibo
mi su'oroi jinvi lenu ko'e jimpe la'e le se cusku be mi
>>li'u
.i lu<< .iku'i mu'ima va'o la'e so'odi'u ko'e co'a bradi do >>li'u
.i lu<< na birti .i mapaunai jimpe le stura bele menli belei puzu respa
.i seki'unai la'ede'u mi pupuziki gasnu lenu xendo ko'e
.i mi'a puzi klama zo'a lo bende belo xanto .ijeseki'ubo mi
mu'i lenu djica lenu fanta lenu damba noi cumki fa lenu ke'a
se jalge lenu ko'e se xrani cu cusku
lu<< ko se kajde fi tu'a le mabru >>li'u
>>li'u
—in
ckafybarja
ni'oni'o fu'e
mi su'orere'u .u'ecu'i zvati ti .i .o'u ze'u na go'i .i slabu vrici vi
lei bitmu .i balre .i'u.ua .i ba'anai secu'u le refselta'a befi la
ramakricnan. be'o le pafpafpa'u pe le jatna cu misno balsoi .i .oiro'e
nadmorji .i y. .i dy. pu cusku .y ma .i .ua.ui cusku lu
lo jy. pa'urpa'urpa'u to'i sa'a jy. du le barja jatna toi goi ko'a ca
leza'i ko'a nanca lipavo kei le ko'a lanzu lei zeipre cu gunta .i lo
se lanzu fi ko'a le du'u lo verba tu'a lo balre cu xlali cu cafciksi
.i'e .i ku'i ko'a jundi gi'i za'o tolselzi'e zukte vau paunai .i ja'o
nagi'e .i ta'onai lei zeipre lo lazyxa'u ca le nu le ko'a citme'a lo
risfoi cu gunka zvati cu jbikla .i ko'a sezmipri .ibabo ko'a le zy.
goi ko'i jatna tu'a le claba'e pe le ko'a patfu cu catra le'ori'e .i
.y. na .oiro'a go'i .i .y. .i .uanaivu'onai ko'a jy. talsa gi'ebabo
go'a .i ba'o la'e di'u le ko'a patfu to noi do jimpe ju'o pei ledu'u
ji'a xamgu damba kei ke'a toi ko'a le ka balre pilno snura co'a lacri
.i ko'a noi pamei ku'o le kamji'e nunra'i ku joi loi cidja selsro jy.
jinga .i sega'a la'edi'u ko'i cu livbajra ti'e .i ja'a livbajra .u'i
li'u .i mi jetnu kucli .i pe'i birje lisri
ni'o selmo'i .i mi .e'u de'a morji gi'e zutse .a'enairo'o .i compre .i
mi nitcu lo tcati .i lu doi beipre lo tcati .au li'u se krixa mi no'i mi
tcecuxna .i roroi go'i .i lu lo jbari tcati .e ci sakta li'u nalsmaji .i
mi pinxe no xalka mixre .e no ckafi .i du'ercu'a no'i lo snuvru cu tirna
sosmentu .iba.uobo lo tcati se bevri lo ba'e trina cai .i ri goi ko'a zi
ju'o co'a vi gunka ni'i le nu ko'a cnino mi .i secu'u lu fi'i do tcati
li'u fi'o voksa lo mlerai cu dunda ty. .i .a'uro'u .i xekri kerfa gi'e
mliburska skapi gi'e zantai tatru gi'e co'e ro'usai .i ko'a cisma .i .ue
catlu be mi cisma .i cincta ke casnu cfari cando bo zutse .i zo citlat.
cmene ko'a cu'u ko'a .i to zo cinba ji'a xamgu pe'ipei paunai segi'u jai
mabla bavysmadi .i mi ja'a .e'i lifri lo dimna be mi toi .i melbi mi fa
ko'a joi le cabna
.i se'o djedi co selnei mi
fu'o
—goran
drata ke ckafybarja lisri
mi nerkla le ckafybarja i ne'iku milxe manku i le ralju selska be le barja cu bunre i so'i klesi be loi bunre i mudri loldi ije mudri bitmu i ji'a lei jubme cu mudri gi'eku'i se cpana loi blabi je xunre jubgai noi na gacri piro le sefta i lo na'e mutce gusni cu pagre lei ca'orgai i ranji sance loi nu loi dirgo lei blaci cu bleda'i i ne'inaiku carvi |
|
ckafybarja lisri
krasi fa https://mujbau.sagitta.uberspace.de/ckafybarja-lisri/
.i je'u na jai pu'arno .i ku'i ja'a ckafybarja lisri
.i je'u na jai pu'arno .i ku'i ja'a ckafybarja lisri
ni'o ko'a milxe mutce lo ka jinvi lo du'u ko'a lisri certu .i se mu'i bo cafne fa lo nu ko'e joi mi fi ko'a cu ve lisri .i fatci fa lo du'u ko'a ta'e lisri lo pluja dukse milxe .i fatci ji'a fa lo du'u ko'a se raktu frili .i ku'i mi .e ko'e mutce lo ka nelci lo ve lisri .i je lo ko'a lisri cu ta'e zdile
ni'o ca lo bi'u nai djedi ku ko'a te lisri fi di'e
lu ni'o pu ki ku ca'o le jamna temci to'i ro do ja'a djuno ka'u dai fi le jamna temci toi ku ta'o nai ca'o le jamna temci ku lu'o pa jatna ku joi lo jy. sonci vai mei cu sisku dzukla bu'u lo snanu jbogu'e sastu'a .i minde ra lo nu kavbu pa prenu poi se gubysizykai fi lo ka jatna lo ralju girzu be lo ka flapro .i lo bilni ralju cu birti lo du'u da'i lo nu lo bi'u nai prenu cu mo'u se kavbu ku ja'a se jalge lo du'u pi rau cu'o fa lo nu jamna jinga
ni'o du'o lo mipyzga ku djuno lo du'u la'a sai lo fapro jatna lo jibni be la xagvar. cu zvati .i se mu'i bo lo la xagvar. tumla cu se klama lo bi'u nai sonci
ni'o crisa .i je glare mutce .i da'i nai tolfadni fa lo crisa lo ka glare tcima ku lo'i te morji .i ze'u ku lo sonci girzu cu sisku dzukla fo lo pulce bunre joi grusi dargu noi jbini lo sudga foldi be lo pelxu joi grusi srasu .i carmi mutce fa lo solri gusni .i je lo tsani cu dilnu claxu .i lo noi mulno lo ka se pilka lo pulce ku'o sonci cu mutce lo ka taske .e lo ka tatpi .i je ba'o tsali
ni'o lo tumla na selte'i lo ka xlali .i lo xabju ji'a cu kusru .i ga'a lo diklo ke nurma prenu ku lo sonci cu krati lo kustru noi fuzme lo nu jamna ku .e ja'e bo lo ka ra tolgeitce .i so'i lo xabju cu cmibi'o lo flapro gi'e damba lo sonci .i lo drata ji'a cu zukte fi lo ka lo sonci cu steba zenba .i sabji fapro .i ticysku fau lo nu ve preti .i vimcu lo dagme'esni
ni'o sekai lo ka tatpi mutce se ja'e pi ro lo bi'u nai ka nandu kei kei ca pa lo glare ke pulce lecydo'i lo sonci cu mo'u klama lo dargu te kruca .i na djuno lo du'u ma kau pluta la xagvar. .i ku'i vi lo te kruca ku ca'o surla lo nu zutse lo rokci ku fa pa tolci'o tercange .i se taxfu lo na'e jinsa palku .e lo creka be lo ba'o blabi matli .e lo srasu mapku .i zukte fi no da
ni'o ca'o ku ko'e noi za'o se cinri ku'o co'a jundi lo cmalu sraku be lo jubme mudri .i rufsu ke linji pixra lo se nazbi be lo clani be'o noi kucli zgana ga'u lo bitmu ku'o ku joi lu la kilroi ti zvati li'u
ni'o lu .i mo sei ko'a noi milxe lo ka fengu fi lo ka co'u se jundi ku'o cu cusku li'u
ni'o lu .i ti poi .y. sraku sei spusku .i la kilroi cu mo .i ji'a zo kilroi ki'a zo'u zo kinli zo roi mo vau ki'a li'u
ni'o lu .i ba'e li'a do citno gi'e na'e prije .i zo roi laldo rafsi zo rokci li'u ko'a nobli voksa se cusku .i lu .i do bilga lo nu ba'e zirbi'o ki'u lo do ka na'e djuno sei mi'amli jmina li'u .i ko'a mutce lo ka jgira tu'a di'u kei ku gi'e jdice lo du'u ba notci
ni'o lu .i lo se cusku be do cu ve ciksi no da li'u
ni'o lu .i ba'e ta'o nai …
ni'o lo sonci jatna lu doi tolci'o do'u ko cusku lo du'u ma kau pluta la xagvar. vau .e'o li'u kixsku fi'o voksa lo rufsu
ni'o lo tercange cu na'e muvdu gi'e spusku no da .i ba za bo ty. noi cutci claxu ku'o se pi'o lo jmadegji pa linji cu finti co sraku be lo dargu canre te zu'e lo nu farna jarco
ni'o se ga'a lo tai tolcumla nu jarco lo ka lazni kei kei lo jatna co'a fengu mutce
ni'o lu tai ka lazni sei jursa voksa ke vlasfa kixsku .i ro lo tercange cu tai lazni .i'a nai sai .i ja'e bo lo gugde na xagyfarvi .i ja'e bo ci'ernunbi'o troci .i ro do cu lazni gi'e gunka gi'o bo jai se bapli .i do ku'i doi tolci'o do'u cu traji fo ro lo'i lazni .i ze'a lo nu mi jmive kei mi no roi viska lo mupli be lo ka tai lazni li'u
ni'o lo jatna cu de'a krixa te zu'e lo nu vasxu .i je ba bo jmina cusku
ni'o lu da'i do pu'i jarco fi mi fe lo mupli be lo ka lazni ba'e zmadu .i je bo mi dunda re no lo rupnu do li'u
ni'o lo tercange cu ze'a na'e muvdu .i ba bo fi'o voksa lo tatpi cu cusku lu lo rupnu zo'u pe'u do punji fi lo mi daske li'u
ni'o di'u lisri fi ko'a ca lo bi'u nai djedi .i mo'u lo nu lisri ku mi'a tavla na'e mutce .i ko'a ca'o fegmli ko'e lo nu ko'e na'e zuksi'a tu'a lo lisri .i ko'e ca'o jinvi lo du'u bebna lisri .i mi zo'u zutse gi'e pensi fe pe'a ro da joi no da
RSS Feed
