.i so'i ckafybarja lisri ba'o se finti .i ĭa na to'e jetnu fa lo du lo ckafybarja lisri cu na'e tolvajni pagbu lo jbobau kulnu je lo citri pe lo jbobau prosa .i ti liste lo ckafybarja lisri poi lo nu finti ki cu pu'arno (to ro lo ckafybarja lisri ca jai pu'arno .i ku'i lo nu finti su cnino cu cumki (to .e'e toi) toi) .i je'u so'i mei .i pe'i lo nu xo kau mei cu banzu lo nu lo ckafybarja lisri cu pa mei lo ralju liskle pe lo jbobau prosa

.i ca lo prula'i crisa mi cpacu pa ciftoldi be la'o me. Deilephila elpenor .me lo purdi je cu bevri ra lo kumyzda .i mi zbasu pa cmalu zdani be lo ciftoldi .i lo nu go'i cu nu mi setca lo dertu je lo pezli lo tanxe .i mi pu djuno lo du lo ciftoldi cu bredi lo ka binxo lo makcu .i djuno ki'u lo nu su'a lo bredi ciftoldi na'o tolcando ja sutra parkla lo jai cunso .i je'u ba'ibni lo nu mi mo'u xrukla lo zdani be mi kei fa lo nu lo ciftoldi cu nerkla lo dertu je co'a denpa

.i lo toldi be la'o me. Deilephila elpenor .me na'o voi ki nerkla lo dertu ca lo crisa je cu zvasta (to fau lo nu krisali toi) ze'a lo dunra ja ze'a lo ditybramau .i lo makcu binxo cu ganse lo nu ma kau ni glare fa lo bartu .i ta'i djuno lo du xu kau lo dunra ba'o prubi'o .i ki'u ru lo kurji be lo tai toldi zo'u vajni fa lo nu djuno lo du bilga lo ka gau ce lo vanbi be lo ciftoldi cu stali lo ka lenku .i va'o lo nu zvagau lo toldi zdani lo glare kumfa cu tcica lo toldi lo ka krici lo du ba'o dunra .i xlali lo toldi fa lo nu jbenyzu'e ca lo dunra .i se ki'u bo drani fa lo nu lo kurji cu punji ra lo lenku stuzi .i mu'a fi lo balni ja lo lolnitku'a (to je'u pa mei lo zasti tadji fa lo nu gau zvasta fa lo makcu binxo lo ba'e lekmi'i ze'a lo dunra toi) .i ma krinu lo nu xlali fa tau ca lo dunra .i go'i fa ga je lo nu lo dunra cu dukse lo ka lenku gi lo nu lo xrula poi lo toldi cu nitcu tau ki na zvati ca lo dunra

.i mi djuno pi ro la'e di'u .i ku'i mi pu dukse lo ka ze'a ma kau denpa kei ja'e lo nu ŭe lo toldi pu zi lo djedi be li re cu jbena .i cnita dei fa lo pixra be lo toldi (to ko mi fraxu tau lo nu na'e prane pixra toi)

.i ja'a melbi toldi .i la'o me. Deilephila elpenor .me na'o skari lo melbi xunblabi je lo melbi pelxu .i lo me mi moi cu dunli fi lo ka melbi (to lo catlu be lo gapru pixra ka'e facki lo du fetsi toi)

.i ku'i mi ca lo nu facki lo du ba'o jbena cu mutce lo ka se malspaji kei je co'a dunku .i clirydu'e .i mi pu djica lo nu jbena ca lo na'e lenku citsi .i mi zungi je cu xanka lo nu lo toldi no roi ba bartu lo ri cmalu zdani

.i ki'u lo nu lo cidja spati na banro ca lo dunra kei mi sabji fi lo toldi fe lo cidja poi laldo badna ja poi mixre lo bicysakta joi lo djacu (to na to'e fadni .i lo toldi kurji ta'e pilno lo simsa toi) .i ku'i mi na birti lo du xu kau lo toldi cu citka .i su roi vofli ne'i lo ri tanxe .i su roi zutse lo cidja .i ku'i mi nu'o zgana lo nu ca'o citka ga ja lo badna gi lo bicysakta djacu .i za'o jmive .i ku'i mi na djuno lo du ze'a ma kau ba ca'o go'i